Que passi au renovelable

Perqué passar a las energias renovelablas dens lo men larèr ?

• Que contribuatz a la luta contra lo rescauhament climatic e a la preservacion de l'environament. En efèit, l'utilizacion de las energias ditas « renovelablas » que limita la produccion de gas d'efèit de sèrra.
• Dens l'encastre de l'autoconsomacion dab panèus solars, vosauts hèitas de las economias en profieitant d'ua energia gratuita e inestaribla, qui produseishetz vos medisha.

Quaus accions méter en plaça e com estar ajudat ? 

Soscríver un contracte de hornidura d'energia (electricitat e/o de gas) d'origina renovelabla

L'electricitat presenta suu hialat de distribucion qu'ei la medisha entà tots los francés. Solament, que provien de diferentas honts d'energias : los renovelables (eolian, solar, idraulic, etc.) e los nuclears o termics (carbon, fiol, gas). En soscrivent un contracte d'energias renovelablas o electricitat verda, que contribuatz au desvolopament de las produccions utilizant honts d'energias renovelablas. Aquera causida qu'incita en retorn los actors deu mercat a causir mòdes de produccion mei ecologicas.

De las estructuras engatjadas en favor de la transicion energetica (dont daubuas reconeishudas per l'ADEME) que prepausan contractes de hornidura d'electricitat renovelabla : Enercoop, Qu'alternè,Octopus Energy França, Ilek, Happ-e by Engie.

A l'escala mei locau, Enargia qu'ei un hornidor locau cooperatiu qui prepausa electricitat renovelabla.

Installar panèus solars 

La prumèra estapa abans d'installar panèus solars qu'ei de s'assabentar sus la factibilitat deu projècte. Entad aquò har, ua atruna qu'existeish : locadastre solar País Basco. Que permet de's har ua prumèra idèa de l'interès e de la rentabilitat de l'installacion de panèus sus la soa teulada (susfàcia disponibla, Mwh produits, còst e retorns sus investiment, etc.). 

Entà la pausa de panèus, que podetz contactar dirèctament un installator en consultant los sites internet de Qualit'ENR, Qualibat o Qualifelec. Aqueths organismes de certificacion qu'avaloran e qu'accèptan installators de panèus solars (fotovoltaïcs e termics) sus tota França.

Las installacions qui permeten l'autoconsomacion (consomacion de la soa pròpia produccion d'electricitat) que son eligiblas a ua prima a l'investiment . Qu'ei degressiva e variabla en foncion de la poténcia de l'installacion. Que trobaratz mei d'informacions sus aqueth dispositiu e autes ajudas a l'installacion de panèus fotovoltaïcs suu site deu ministèri de l'Economia.

Se cauhar au bòsc 

La husta qu'ei ua ressorsa qui pòt respóner a de nombrós besonhs : cauhatge d'apunt, cauhatge centrau, individuau o collectiu, o enqüèra la produccion d'aiga cauda sanitària. L'un deus sons avantatges qu'ei que lo son aprovesiment pòt estar locau. Totun, quauquas consignas que son a respectar entà se poder cauhar eficaçament, en limitant las emissions de polluents (particulas finas). 

En efèit, lo cauhatge au bòsc qu'ei actuaument responsable de mei de 40% de las emissions de particulas finas. Mes aqueras emissions que son limitadas en causint plan lo son equipament (insert o larèr barrat, padena a socs o a granulats, cautèra manuau o automatica). 

Se cauhar o se refresquir gràcias a l'energia deu sòu (géothermie)

Ua pompa a calor geotermica (PAC) presenta de nombrós avantatges entau cauhatge e la climatizacion. Qu'utiliza la calor constanta deu sòu, çò que la torna hèra eficaça e que permet de redusir significativament los còsts energetics. En mei, qu'ei ecologica, pr'amor qu'utiliza ua hont d'energia renovelabla e que genèra drin d'emissions de CO₂ . Lo son foncionament silenciós e la soa durabilitat que'n hèn ua solucion hidabla e confortabla entà mantiéner ua temperatura agradiva tota l'annada. 

Produsir la soa aiga cauda sanitària gràcias aus panèus solars termics

Produsir aiga cauda sanitària dab panèus solars termics presenta de nombrós avantatges. Aqueth metòde qu'utiliza l'energia solara, ua hont renovelabla e gratuita, çò que permet de redusir los còsts energetics e de diminuïr la dependéncia aus combustibles fossiles. Qu'ei ecologica, contribuant a la reduccion de las emissions de CO₂ e a la luta contra lo cambiament climatic.