Perméter l'accès a un lotjament entà tots

Los desfís a relhevar

• Perméter a tots los abitants deu territòri de lotjà’s en incitant los proprietaris a virà’s de cap tà la locacion a l'annada e en mantienent prètz accessibles a tots los cobles ;
• Respóner aus besonhs en lotjament deus cobles modèstes, en creant navèths lotjaments sociaus (a la locacion o a la crompa) sus l'ensemble deu territòri, dens lo respècte de las obligacions de la lei Solidaritat e renovelament urban ;
• Renovar massivament lo parc de lotjaments existents e densificar los còrs de vila entà preservar los nòstes espacis naturaus e lo fonsièr agricòla ;
• Agir entà mei de solidaritats en prepausant mei d'auhèrtas d'aubèrgament a las personas en situacion de precaritat e a las personas handicapadas e dependentas ;
• Repensar las nòstas faiçons d'abitar e de bastir las nòstas vilas e vilatges dab la lei « Zèro Artificialization Neta » qui fixa un objectiu de reduccion de mieitat deu consum d'espacis naturaus, agricòlas e forestièrs d'ací 2031.

Las mesuras dejà adoptadas

• La Comunautat qu'a hèit deu lotjament ua prioritat absoluda. Autanlèu 2021, qu'a adoptat lo son Programa Locau de l'abitat 2021-2026 entà respóner de faiçon coordinada aus desfís que deu relhevar lo territòri (reequilibratge de l'auhèrta de lotjaments sociaus, revitalizacion deus còrs de vila, solidaritat de cap a las personas en situacion de precaritat, etc.) ;
• La Comunautat País Basco qu'a metut en plaça un reglament suu cambiament d'usatge qui preved ua obligacion de compensacion entà limitar lo desvolopament exponenciau deus moblats de torisme au profieit de lotjaments a l'annada ;
• Qu'a tanben defenut l’aviada d'undispositiu d'enquadrament deus loguèrs qui es entrat en vigor despuish lo 25 de noveme de 2024 e qui deu perméter de limitar l'aumentacion deus loguèrs dens los sectors en hòrta tension immobiliària e d'empachar los loguèrs abusius ;
• Capvath las ajudas a la pèira, la Comunautat País Basco que participa aus costats de l'Estat, deu Departament e de las comunas a la construccion de lotjaments locatius sociaus (2227 lotjaments creats). Qu'a tanben signat dab los operators deu territòri ua carta qui a per mira de produsir lotjaments en accession a la proprietat a prètz abordables ;
• Entà favorizar la mixitat sociau, la Comunautat País Basco qu'impausa, peus documents d'urbanisme, ua part minimau de lotjaments sociaus dens los programas navèths de construccion. Que participa tanben au desvolopament de solucions d'aubèrgament d'urgéncia entaus mei precaris e qu'ajuda las personas dependentas au manteniment a domicili ;
• Tanben, sus l'enjòc màger de renovacion deu bastit existent, la Comunautat País Basco qu'a obèrt duas Maisons de l'abitat e de l'energia a Baiona e Sent Palai. Expèrts qu'acompanhan a gratis los proprietaris dens las lors òbras (isolacion, adaptacion a las personas dependentas, energias renovelablas). Mercés a las ajudas a la pèira, que finança tanben, en complement de las autas ajudas publicas, las renovacions suu parc privat e qu'a recentament votat un dispositiu d'ajuda a las renovacions energeticas performantas ;
• Fin finala, que mia aus costat de las comunas deus projèctes de renovelament urban de gran endom dens sites estrategics deu territòri com sus la Riba dreta d'Ador, la zòna d'Irati a Biàrritz o l'Enquant a Sibore entà tornar dinamizar aqueths espacis de vita ;
• La Comunautat País Basco qu'a tanben organizat un collòqui gran a l'entorn de la lei « Zèro Artificialisation Neta » qui va obligar a un cambiament en pregondor de las nòstas faiçons de bastir dens las annadas a viéner.

Los obradors a miar enqüèra

• Participar a la mesa en debat deus enjòcs deu lotjament, de la densification urbana, de l'evolucion deus paisatges deus còrs de vila e deus centres borgs entà adaptar miélher los projèctes e ahortir la lor acceptabilitat ;
• Estructurar lo hialat d'actors e las cordèras de la renovacion de l'abitat suu territòri ;
• Perseguir la mesa en plaça deus dispositius incitatius, reglamentaris o fiscaus disponibles qui a per mira de mobilizar los lotjaments existents e limitar la vacança com la sosaucupacion ;
• Perseguir l'amainatjament deus terrenhs necessaris a l'arcuelh de la gent deu viatge.

Vosauts tanben, engatjatz-vse !

• E desiratz renovar lo vòste lotjament ? Contactatz la Maison de l'abitat e de l'energia País Basco qui'vs poirà acompanhar dens totas las vòstas afranquidas ;
• E desiratz reméter un lotjament vacant suu mercat ? Que'vs podem tanben ajudar ;
• E cercatz un lotjament sociau ? Que trobaratz suu noste site Internet totas las informacions entà’vs guidar, que sia entà un projècte de locacion o de crompa ;
• Qu'ètz locatari, que podetz verificar si lo vòste lotjament es concernit per l'enquadrament deus loguèrs ;
• Qu'ètz proprietari, tienetz-vse informat de las obligacions tà çò de la locacion sasonèra. Que podetz tanben causir la locacion solidària e shens risc.