Que creï la mea enterpresa

Abans d'aviar

La desmarcha de creacion d'enterpresa qu'ei iterativa . Las vòstas recèrcas e reflexions que'vs miaràn progressivament a :

• detectar oportunitats ;
• validar o non de las ipotèsis ;
• vs'adaptar entà mélher « pegar aus besonhs de la vòsta futura clientèla » ;
• modificar l'ambicion deu vòste projècte
• etc.

Los retorns endarrèr que son inevitables entà efectuar las modificacions e ajustaments necessaris. Tanben, entà vs'ajudar a crear la vòsta enterpresa a País Basco, aquí ua lista d'estapa claus a seguir e de conselhs practics entà s'i escàder.

Estapa 1 : Definitz e qu'avaloratz la vòsta idèa

Ua idèa que pren sovent la fòrma d'ua intuicion o d'un simple desir qui s'apregondeish e que madura dab lo temps . Mei l'idèa qu'ei navèra o originau, mei que'vs deuratz interrogar sus la capacitat deus futurs clients a l'acceptar. Mei qu'ei banau, mei que deuratz soscar a la soa reau utilitat cap a l'auhèrta dejà existenta.

Definitz precisament la vòsta idèa per escriut. Si presenta un caractèr de nautat, que siatz en mesura de provar que n'ètz plan a l'origina. Depausatz per exemple ua envolopa soleau au près de l'Inpi, çò que'vs permeterà de constituïr ua pròva de creacion e de balhar ua data certana a la vòsta idèa o lo vòste projècte.

Qu'Asseguratz qu'i a plan ua coheréncia enter la vòsta personalitat, las vòstas motivacions, los vòstes objectius, lo vòste saber-har, las vòstas ressorsas e constrentas personaus e las exigéncias deu vòste projècte. Si incompatibilitats apareishen, que deuratz recercar solucions : vse formar, recercar partenaris, constituïr ua equipa de tribalh a las competéncias complementàrias, adaptar lo vòste projècte, etc.

Estapa 2 : Qu'Asseguratz d'aver clients

B'ei un element capitau ! Shens clientèla, n'i a pas enterpresa possibla ! Ua « genhèc idèa » que pòt vàder un maishant projècte, fauta de clients. Per contra, ua « idèa banau », dens de bonas condicions, que's pòt averar plan lucrativa.

La realizacion d'un estudi de mercat qu'a entà objectius de :

• definir dab precision quau serà la vòsta clientèla, las soas espèras ;
• vse posicionar de cap a la concurréncia ;
• adaptar lo vòste produit o lo vòste servici en foncion deus elements reculhits.

D'un aute costat, l'analisi d'aqueths elements que'vs permeterà de :

• definir un nivèu de prètz acceptable peus vòstes futurs clients ;
• determinar la vòsta estrategia e chifrar las prumèras accions comerciaus e de comunicacion necessàrias entà captar los vòstes clients ;
• fixar ua chifra d'ahar previsionau.

Estapa 3 : Chifratz lo vòste projècte

Aquera estapa que consisteish a respóner a tres questions essenciaus :

• La vòsta enterpresa que serà rendabla, e a quau moment ?
• Quaus son los capitaus necessaris entà lançar lo projècte dens de bonas condicions e assegurar lo son desvolopament ?
• Las recèptas crubadas (venta de produits e/o servicis) per la vòsta enterpresa tot lo long de l'annada que'u permeteràn d'afrontar a contunhar a las despensas deu medish periòde (pagament de las cargas correntas, deus hornidors, etc.) ? Qu'ei a díser com previéner deus problèmas de dinereria e determinar las condicions de chifra d'ahars a realizar entà desgatjar un resultat positiu ? Los delais mejans de pagament deus hornidors e deus clients dens lo vòste sector d'activitat, enquadrats per la lei, que son elements dont devetz har compte.

Aquera desmarcha que'vs va condusir a bastir un projècte coherent e viable presentat dens un dossièr, aperat business plan. Cada opcion que trobarà la soa traduccion financèra e la soa repercussion suus equilibris financèrs. Si lo desequilibri ei tròp important, lo vòste projècte que deurà estar remanejat e la soa estructura financèra adaptada en consequéncia.

Conselhs : Ne sosestimetz pas los vòstes besonhs financèrs ! N'esitetz pas a véder « gran » : lo vòste projècte qu'a dilhèu mei de potenciau que l'imaginatz pas ! Ne demoratz pas sol, ce apressatz Aglomeracion País Basco e deus sons partenaris, entà vs'ajudar a bastir lo vòste projècte. Obtienetz egaument conselhs e la validacion de la vòsta business-plan au près d'un expèrt-comptable.

Estapa 4 : Recercatz finançaments

Lo bon finançament d'un projècte de creacion d'enterpresa qu'ei l'ua de las condicions de la soa escaduda. Que vatz dever trobar pro de capitaus entà que los besonhs qui avetz identificats que sian finançats integraument .

Après aver recensat aqueths besonhs e avalorat las ressorsas qui podetz aisidament mobilizar, que'vs calerà identificar e sollicitar un o mantun finançament entaus capitaus mancants : prèst d'aunor a taus zèro e shens guarantida, finançament participatiu, micro-crèdit, prèst bancaris, recèrca d'investidors au capitau sociau de l'enterpresa, etc.
Lo supòrt d'un organisme avent ua perfèita coneishença de las atrunas de finançaments existents entaus creators e de las ajudas a la creacion d'enterpresas que pòt estar preciós ad aqueth estadi. 

Deus hialats d'acompanhament e de finançament que's tienen a la vòsta disposicion sus l'ensemble deu territòri País Basco.

Estapa 5 : Que causeishetz un estatut juridic

L'estatut juridic que correspon au quadre legau dens lo quau vatz exercir la vòsta activitat. Mantua possibilitat que s'auhereish a vosautas, que convienerà de har compte de diferents critèris entà causir l'estatut de la vòsta enterpresa.

Que creatz sol, que deuratz optar enter l'enterpresa individuau, qu'ei a díser en nom pròpi (regime micro-enterprenedor o enterpresa individuau « classica ») o ua societat (EURL, SASU). Que creatz a mantuns, diferents tipes de societats que s'auheriràn a vosautas : SAS, SARL etc.

Dens tots los cas, ne negligeishetz pas aquera estapa e que causeishetz la vòsta estructura dab l'ajuda d'un professionau deu dret, avocat o aute, qui'vs poirà egaument aconselhar dens la redaccion deu contracte de societat (l'apòrt en capitau, lo tipe d'imposicion, etc.). La vòsta causida qu'aurà repercussions entà vosautas, tant au nivèu patrimoniau qui sociau e fiscau. Que pòt egaument engatjar l'aviéner de l'enterpresa. 

Qu'ei recomandat de non pas partir dab ua idèa preconcebuda, mes de's penjar suus diferents estatuts entà n'analisar los avantatges e los inconvenients cap au vòste projècte e a la vòsta situacion personau.

Estapa 5 : Balhatz vita a la vòsta enterpresa

Entà que la vòsta enterpresa aja ua existéncia juridica, que deuratz efectuar lo depaus deu vòste dossièr de matriculacion au près deuGuichet unic. Las formalitats entà crear ua enterpresa que son uei desmaterializadas, que's pòden har dirèctament en quauques clics sus aquera platafòrma.

Que receberatz puish un numèro d'identificacion de la vòsta enterpresa : lo vòste numèro Siren. Un SIRET que'vs serà egaument desliurat per l'INSEE entà cadun deus vòstes establiments. 

La vòsta enterpresa que serà constituïda e que poiratz alavetz aviar la vòsta vita navèra de joen enterprenedor.

E si avetz pas idèa de creacion d'enterpresa, que pensatz a la represa d'ua enterpresa existenta . De nombrosas enterpresas que son a véner : haut o baish 700 000 dirigents que deurén cedir las lors enterpresas dens las 10 vienentas annadas.