La qualitat de las aigas de banhada

La qualitat de l'aiga sus la mea plaja

Gràcias a l'aplicacion Kalilo, que podetz conéisher en temps-reau la qualitat de l'aiga sus las 35 zònas de banhada contrarotladas a País Basco. 

• Si la goteta ei blua, la qualitat de l'aiga qu'ei confòrma
• Si la goteta ei vriuleta, la qualitat de l'aiga n'ei pas confòrma . La banhada qu'ei defenduda .

L'informacion qu'ei actualizada au briu de la jornada e 7 dias/7 enter la mieitat de mai e a la fin de seteme entà totas las zònas de banhada e tota l'annada entà las plajas d'Anglet e de Biàrritz. L'informacion qu'ei disponibla en 4 lengas : francés, basco, anglés e espanhòu.

Practic, l'aplicacion Kalilo que permet tanben de conéisher las condicions meteorologicas, de tranga e èste previenut en cas de barradura de las zònas de banhada.

Com ei avalorada la qualitat de las aigas de banhada ?

La qualitat de l'aiga de la mea plaja qu'ei avalorada segon :

• un seguit règlementaire, assegurat per l'Agéncia regionau de Santat (ARS) de Novèla Aquitània ;
• un seguit de gestion quotidiana assegurat per la Comunautat País Basco. 

Los paramètres examinats que son las concentracions de 2 tipes de bacterias indicatoras : Escherichia coli e enterocòcs.

Lo seguit e classament règlementaire de la qualitat de l'aiga de las plajas

Un classament de la qualitat de l'aiga de cada plaja qu'ei establit cada sason sus la basa deus resultats de las analisis règlementaires de las 4 sasons precedentas. Aqueras analisis que son realizadas enter 10 e 20 còps per sason, per l'ARS Novèla Aquitània.

Que podetz consultar aqueth classament e los resultats d'analisis suus panèus d'informacions presents sus cada plaja (en sason) e suu site Internet de l'ARS.

Sus la còsta basca, totas las plajas que son classadas en serviciau o excellenta qualitat.

Ua gestion au quotidian de la qualitat de l'aiga de las plajas

Enter lo 15 de mai e lo 30 de seteme e tota l'annada entà las plajas de Biàrritz e d'Anglet, ua susvelhança en temps reau de la qualitat de l'aiga qu'ei assegurada per la Comunautat País Basco, en ligam dab las comunas. Qu'ei çò qui s'apèra la gestion activa de la qualitat de las aigas de banhada.

Concrètament, un ensemble d'indicators que son pres en compte e qu'alimentan los modèles de prevision, taus com :

• las condicions meteorologicas e oceanicas en temps reau e la lor prevision : pluviometria, vent, tranga, etc. ;
• l'estat deu foncionament deus sistèmas d'assaniment : alèrta en temps reau en cas de disfoncionament ;
• los resultats d'analisis bacteriologicas rapidas qui permeten d'aver ua informacion en 3 òras, sia abans l'obertura de la susvelhança de las zònas de banhada.

Aquò que permet :

• ua prevision quotidiana : cada matin, aqueras informacions combinadas que permeten d'establir ua prevision de la qualitat de l'aiga entà la jornada ;
• ua reactivitat en temps reau : si aqueths indicators evoluan pendent la jornada (disfoncionament, auratges, plojas intensas, pollucion accidentau, etc.), l'alèrta qu'ei balhada e ua actualizada en temps reau de l'avaloracion de la qualitat de l'aiga qu'ei realizada per las equipas d'astrenta .

Aqueth reportatge, realizat dab TVPi, que mòstra lo tribalh de las equipas ne carga deu seguit de las aigas de banhada.

Com ei relhevada l'informacion ?

L'informacion sus las plajas

L'informacion en cas de risc de degradacion momentanèa de la qualitat de l'aiga qu'ei relhevada a la comuna qui decideish autan necessària d'ua barradura preventiva de la banhada, materializada peus drapèus roi e vriulet sus las plajas susvelhadas.

L'aplicacion Kalilo

L'informacion sus la qualitat de l'aiga prevista qu'ei balhada e actualizada en temps reausus l'aplicacion Kalilo, dens la quau ei materializada per ua goteta (blua - qualitat confòrma - o vriuleta - risc de degradacion de la qualitat), dont en dehòra deus oraris de susvelhança de la banhada peus sauvaires.

Los bilanç sason

La Comunautat País Basco que produseish cada annada ua sintèsi de las principaus dadas sus las aigas de banhada de País Basco. Que son sustot comunicats : lo classament de las zònas de banhada, la frequentacion, lo nombre de dias d'obertura de las plajas, d'episòdis plojós, etc.

Los perfius de banhada

Un perfiu de banhada qu'identifica las honts de pollucion podent afectar la qualitat de l'aiga de banhada e presentar un risc entà la santat deus banhaires.

Lo perfiu que compòrta 3 punts hòrts :

• l'identificacion de las honts de pollucion temporàrias, permanentas o potenciaus susceptiblas d'aver un impacte sus la qualitat de las aigas e d'afectar la santat deus banhaires (èx : reget d'aigas usadas) ;
• la definicion de las mesuras de gestion a començar entà previéner la pollucion a tèrmi cort, (èx: barraduras preventivas, creacion d'estacion d'espuracion o d'escorra d'auratges...) ;
• la definicion de las accions qui permeteràn de preservar o de reconquistar la qualitat de las aigas (èx : òbras de melhorament deu hialat d'assaniment, supression de regets d'aigas usadas).

Ua sintèsi deu perfiu qu'ei disponibla ací devath . Qu'ei egaument afichada sus cada lòc de banhada.