Hons de sostien a las iniciativas transfrontalèras locaus

Beneficiaris

Operators privats (associacions, enterpresas, …) e publics (comunas, establiments publics, gropaments publics, europèus, scientifics…) :

• dont la sedença sociau, o ua antena, qu'ei localizat suu territòri de la Comunautat d'Aglomeracion País Basco ;
• dont lo projècte ei realizat e qu'a un impacte averat suu territòri de la Comunautat d'Aglomeracion País Basco.

Projèctes eligibles

• Lo projècte que deu justificar d'un caractèr transfrontalèr averat ;
• Lo projècte que deu participar a la començada de l'Estrategia de cooperacion transfrontalèra ;
• Lo projècte n'ei pas acabat au moment de la demanda de subvencion ;
• Lo projècte ne pòrta pas sus un eveniment recurrent .

Despensas eligiblas

Solas las despensas de foncionament que son eligiblas e que deven estar estadas engatjadas a comptar deu 1^er genèr de 2023 en ligam dab la conduita deu projècte presentat.

Montant e durada de la subvencion

• Lo beneficiari que receberà ua subvencion a hautor d'un maximum de 50 % deu montant totau de las despensas retienudas ;
• La subvencion acordada ne poirà pas estar superiora a 30 000 € ;
• Lo projècte qu'aurà ua durada de realizacion maximum de 2 ans fixada per convencion.

Procediment de seleccion

Las demandas que seràn prealablament examinadas tecnicament peus servicis de la Comunautat d'Aglomeracion País Basco abans validacion politica. Los sostiens que seràn acordats per deliberacion deu Conselh permanent de la Comunautat d'Aglomeracion.

Critèris d'avaloracion

• Qualitat deu projècte ;
• Rapòrt enter lo budget presentat e lo resultat esperat ;
• Experiéncia deu portaire de projècte ;
• Justificacion de la dimension transfrontalèra deu projècte ;
• Coheréncia dab las politicas publicas de la Comunautat d'Aglomeracion e participacion a la començada l'Estrategia de Cooperacion Transfrontalèra ;
• Respècte deus principis deu desvolopament duradís (economia, sociau e environament) per la soa accion dens la començada deu Plan Climat-Air-Energia Territoriau de la Comunautat d'Aglomeracion ;
• Valorizacion deu plurilingüisme.

Los projèctes qui prenen egaument que'n compta los principis transversaus e tematics seguents que poiràn beneficiar d'ua notacion bonificada :

• Lutar contra lo cambiament climatic ;
• Favorizar la ciutadanetat transfrontalèra ;
• Favorizar los projèctes en ligam dab la joenessa.

La mea demanda d'ajuda

Entà vs'acompanhar au mélher dens lo depaus de la vòsta demanda de subvencion, e d'escambiar a l'entorn deu vòste projècte, ua equipa dedicada que's tien a la vòsta disposicion . Mercés de'ns contactar a l'adreça seguenta : cttcommunaute-paysbasquefr

Entà preparar lo noste prumèra escambi, que trobaratz ací devath un formulari de presentacion de projècte a prat-plear.

Versament de la subvencion

• Ua convencion que serà establida enter l'entitat beneficiària e la Comunautat d'Aglomeracion País Basco ;
• La subvencion que serà versada en dus còps après la notificacion de la soa atribucion au beneficiari ;
• Un 1 ^er versament de 50% que serà realizat a la signatura de la convencion . Lo sòlde que serà desblocat sus presentacion deus justificatius de despensas e d'un bilanç deu projècte qui permeterà d'avalorar la realizacion, los resultats e la perennizacion de las accions, atau com d'un bilanç financèr sus la basa deus justificatius corresponents ;
• Si lo projècte ei fin finau pas realizat o en devath-realizacion, la subvencion que serà anullada o tornada calcular au prorata, e un remborsament deus versaments dejà efectuats que poirà estar demandat.

Obligacions deu beneficiari

L'entitat beneficiària que s'engatja a :

• Informar largament los partenaris, los beneficiaris finaus deu projècte e lo public gran de la participacion financèra portada per la Comunautat d'Aglomeracion País Basco. Atau, lo beneficiari que deurà apausar lo logo de la Comunautat d'Aglomeracion sus tots los supòrts de comunicacion produsits dens l'encastre deu projècte ;
• Utilizar la subvencion unicament entà las accions descrivudas dens lo formulari de candidatura ;
• Associar e convidar la Comunautat d'Aglomeracion aus diferents eveniments en relacion dab lo projècte.