Aperet a projèctes « De cap tau monde ! » en favor de l'occitan-gascon

Contèxte 

Lo 16 de març de 2019 mèrca la presa de competéncia per la Comunautat d'Aglomeracion País Basco de la soa politica lingüistica e culturau occitana gascona, atau com l'adopcion deu projècte corresponent.

Dens aqueth encastre, la Comunautat d'Aglomeracion que's balha entà objectius de sostiéner las iniciativas de transmission e de difusion de la lenga occitana gascona, en intervienent sus las soas politicas comunautàrias e en vienent en supòrt de las comunas e deus operators privats volontaris.

Dens l'objectiu de sostiéner los projèctes deus deus operators privats, la Comunautat d'Aglomeracion País Basco que mobiliza un fons entà la mesa en plaça de l'aperet a projèctes « De cap tau monde ! ».

Objectiu

Aqueth aperet a projèctes qu'a entà objectiu de sostiéner los projèctes participant a la transmission e a la difusion de la lenga occitana gascona suu territòri comunautari.

Eligibilitat

Que pòt beneficiar d'ua ajuda tot operator privat, dont lo projècte :

• que respon aus objectius de transmission e de difusion de la lenga ;
• que's debana suu territòri comunautari ;
• presenta un arrajòu intercomunau. 

Los projèctes de difusion culturau que poiràn estar sostienuts au motiu qui favorizan la transmission e la difusion de la lenga occitana gascona.

Lo caractèr duradís (impacte environamentau e sociau) deus projèctes que serà valorizat . La capacitat d'adaptacion deu projècte a las règlas sanitàrias en vigor que serà apreciada .

Los projèctes sostienuts que deuràn har l'objècte d'un autofinançament minimum de 30 %.

Ne son pas eligibles dens l'encastre d'aqueth aperet a projèctes : los projèctes pedagogics començats suu temps escolar, los projèctes d'ensenhament artistic, los projèctes de creacion artistica e los projèctes d'educacion artistica e culturau.

Depaus de las candidaturas

Lo dossièr complet de candidatura a l'aperet a projèctes « De cap tau monde ! », telecargable ací devath, que deurà arribar au format numeric a l'adreça seguenta : decaptaumondecommunaute-paysbasquefr entau 31 de genèr de 2025 au mei tard. Que serà desliurat au portaire de projècte un corrièr electronic acusant recepcion deu dossièr de candidatura.

Dens lo cas d'un dossièr incomplet, lo portaire de projècte que dispausarà d'un delai de 7 dias a comptar data de recepcion deu corric de notificacion, entà reméter las pèças justificativas mancantas. La candidatura ne vad pas efectiva qu'a la recepcion de l'ensemble deu dossièr.

Procedura d'instruccion e de decision

L'instruccion tecnica deus dossièrs de candidatura que serà realizada peus servicis de la Direccion Politica lingüistica de la Comunautat d'Aglomeracion País Basco.

Un comitat de pilotatge compausat d'elegits membres de la Comission Politicas lingüisticas aura la carga de seleccionar los projèctes e d'examinar proposicions de finançament. Aqueras proposicions de finançament que seràn sosmetudas au vòte deu Conselh permanent de la Comunautat d'Aglomeracion País Basco.

Las decisions finaus que seràn notificadas aus portaires de projèctes peu Vicepresident ne carga de la Politica lingüistica.

Debanada - calendari

La sheisau edicion de l'aperet a projèctes « De cap tau monde ! » que's debanarà segon lo calendari previsionau seguent :

• 10 de deceme de 2024 : obertura de la fasa de candidatura ;
  31 de genèr de 2025 : data limita de recepcion de las candidaturas.

Modalitats d'atribucion e obligacions

Las modalitats d'atribucion de l'ajuda atau com las obligacions deus portaires de projèctes son precisadas dens lo reglament de l'aperet a projèctes, telecargable ací devath.