Euskaldundu : La prumèra campanha d'inscripcion a la borsa d'aprendissatge intensiva de la lenga basca entaus adultes qu'ei obèrta
Euskaldundu, borsa d'aprendissatge intensiva de la lenga basca entaus adultes, qu'ei d'ara enlà obèrta entà la prumèra campanha d'inscripcion. Las demandas que pòden estar realizadas dinc au 15 d'abriu en vista d'un estagi en immersion a partir deu mes de seteme.
Actualizat lo : 26 February 2025
Lo 7 de deceme de 2024, los elegits deu Conselh comunautari qu'an votat la creacion deu dispositiu Euskaldundu, borsa d'aprendissatge de la lenga basca a destinacion deus adultes. Dab aquera borsa, la Comunautat País Basco que desira s'adreçar aus estudiants, joens tribalhaires e parents, ua lesca d'atge cruciau entà passar 21% locutors actuaus a 30% a l'orizont 2050.
Euskaldundu qu'a entà ambicion d'acompanhar en tres ans dinc a 200 personas dens lo lor procediment d'aprendissatge per ua envolopa de 350 000 €. Los futurs beneficiaris que deven residir a País Basco e s'engatjar dens ua formacion intensiva a la lenga basca, dens l'encastre d'un projècte professionau, associatiu o personau.
Ua borsa entà favorizar l'usatge quotidian de l'euskara
Euskaldundu que s'adreça a tots los perfius entà favorizar l'usatge de la lenga basca dens la vita vitanta. Qu'a entà ciblas :
- los joens e los estudiants ;
- los parents qui desirarén transméter la lenga e acompanhar los lors mainatges dens la lor escolaritat bilingua o immersiva ;
- los adultes en situacion d'activitat qui poiràn har víver l'euskara dens lo lor sector professionau ;
- los aprenents a har un tribalh deu ser, qui desirarén accelerar lo procediment d'aprendissatge en i associant un module intensiu ;
- los 24 000 bascofònes receptius qui comprenen l'euskara shens ac poder parlar.
Ua borsa qui s'adapta a tots los besonhs
Euskaldundu que permeterà d'atribuïr dinc a 200 borsas segon la durada de formacion de cada aprenent. Lo montant previsionau de la borsa que serà calculat au par deu candidat e deu nombre d'òras necessàrias entà l'ataca deu nivèu mirat.
Los interessats que pòden candidater a ua formacion intensiva d'au mensh 30h per setmana entà ua durada totau anant d'un estagi intensiu de quauquas setmanas (120 òras) a ua annada escolara (1 500 òras). L'objectiu de la formacion qu'ei de vàder un locutor autonòme (nivèu B1, B2) o experimentat (nivèu C1).
L'ajuda financèra que cobrirà la totalitat de las despensas pedagogicas de la formacion . Que poirà estar realizada a País Basco Nòrd, en Navarra o en Euskadi.
Las candidaturas que son obèrtas dinc au 15 d'abriu de 2025 a miejanueit .
Que retrobatz tots las informacions practicas sus la pagina de presentacion deu dispositiu