Desplegar servicis publics de proximitat

Los desfís a relhevar

• Facilitar las afranquidas administrativas deu quotidian e redusir la fractura numerica en malhant lo territòri de França Servicis ;
• Perméter l'accès a ua auhèrta de suenhs equilibrada sus tot lo territòri en creant Ostaus de Santat e en sostienent l'installacion de professionaus dens las zònas ruraus ;
• Favorizar la practica esportiva e apréner a nadar a tots los mainatges deu País Basco ;
• Assegurar un accès equitable aus equipaments e a las activitats culturaus ;
• Acompanhar l'envielhiment de la populacion e lutar contra l'isolament en desvolopant servicis de manteniment a domicili ;
• Lutar contra la precaritat en desvolopant los aubèrgaments d'urgéncia e en sostienent los actors associatius deu territòri ;
• Desvolopar ua auhèrta de mobilitats de proximitat entà facilitar l'accès aus servicis e aus lòcs publics.

Las accions dejà engatjadas

• La Comunautat País Basco que gereish dirèctament nombrós servicis publics : 11 ninoèras comunautàrias, 5 arcuelhs de lesers, 2 lòcs d'arcuelh mainatges-parents, 3 mediatècas, 8 piscinas, lo complèxe cinematografic Sent Loís a Sent Palai, lo talhèr de fabricacion de decòrs a Macàia o enqüèra la sala d'espectacles Harri Xuri a Lohosso ;
• La Comunautat País Basco qu'a bastit quate ostaus de Santat a Barcús, Tardetz, Maulion e Aissíritz ;
• Capvath lo son contracte Locau de Santat, que sostien tanben las accions de prevencion santat ;
• La Comunautat País Basco qu'a bastit e que gereish cinc Ostaus França Servicis a Tardetz, Maulion, Sent Palai, Bardòs e Sent Joan deu Pè deu Pòrt, en mei deu hialat nacionau existent ;
• La Comunautat País Basco qu'ei a bastir tres salas d'espòrt a Tardetz, Baigüèr e Sent Palai ;
• La Comunautat País Basco qu'a tornat bastir la ninoèra Mamurrak a Espeleta. Un bastiment exemplar suu plan environamentau, bastit dab palha ;
• La Comunautat País Basco qu'a votat un Plan piscina entà perméter aus mainatges de País Basco de saber nadar ;
• La Comunautat País Basco qu'a votat lo son projècte culturau e qu'organiza la difusion pertot suu territòri de las proposicions culturaus de l'Orquèstra deu País Basco, deu Balet Malandain, deu hestau de street art Punts de vista, etc.
• 200 agents deu Centre Intercomunau d'Accion Sociau (CIAS) qu'intervienen a domicili en çò de las personas atjadas e dependentas en País Basco interior ;
• La Comunautat País Basco qu'a bastit, dab lo Conselh Departamentau, ua cosina centrau a Bidaishe qui horneish los repaishs deus establiments escolars, ninoèras, arcuelhs de lesers e beneficiaris deu CIAS entorns ;
• La Comunautat País Basco qu'a bastit lo bastiment de la Banca alimentària de Baiona e deu País Basco. L'associacion que horneish 2 500 000 repaishs per an entà 12 800 personas ;
• La Comunautat País Basco que perpausa equipaments entà viéner en ajuda aus mei precaris com l'ostaleria sociau de Biàrritz, los centres d’aubèrgaments d'urgéncia Manuit a Anglet e Ene Tokia a Baiona o lo centre d'arcuelh e de transit deus migrants PAUSA a Baiona. Qu'ajuda tanben dirèctament nombrosas associacions qui intervienen au près deus mei des·hornits.
• Entà facilitar lo desplaçament de las personas isoladas, la Comunautat País Basco que desplega autanlèu 2025 un servici de Transpòrts a la Demanda (TàD) dens las zònas non desservidas peus transpòrts publics, pertot suu territòri.

Los obradors a miar enqüèra

• Creacion de pòles d'ensenhament artistic en ligam dab lo Conservatòri Maurice Ravel País Basco ;
• Ajuda a l’espandida deu Musèu basco ;
• Construccion e renovacion de navèras piscinas dens l'encastre deu Plan piscinas ;
• Construccion d'un pòle sociau a Baiona amassant mantuns servicis dedicats a la luta contra la precaritat ;
• Agrandiment e modernizacion de las ninoèras comunautàrias.