Aperet a projèctes Plazandere

Objectiu de l'aperet a projèctes

En 2023, la Comunautat País Basco qu'a lançat l'aperet a projèctes Plazandere qui a per mira d'encoratjar e méter en lutz la plaça de las hemnas dens la dinamica socioeconomica e culturau de la Montanha basca, e los obrir lo camp deus possibles entà ua egalitat melhora hemnas-òmis.  

Los projèctes retienuts

En tot, 45 candidaturas que son estadas recebudas, portadas per associacions mes tanben quauquas comunas e deus micro-enterpresas. Los projèctes prepausats que's desparteishen sus tot lo territòri de la Montanha basca a l'entorn de tematicas variadas, avent a còr de méter endavant e har vededer lo ròtle de las hemnas dens la vita locau e lo desvolopament d'aqueth territòri rurau (agricultura, entreprenariat, cultura, espòrt, mèdias, istòria,…), d'encoratjar la practica femenina dens disciplinas/activitats plan genrées, de sensibilizar a la luta contra lo sexisme e los estereotipes de genre, de prepausar espacis e temps d'escambis entà liberar la paraula, ganhar en hidança e en autonomia, préner suenh de si, e desvolopar hialats d'enter-ajuda… 

Totas las candidaturas que son estadas examinadas per ua jurada participativa amassant elegits e representants de la societat civila. 

Dab ua envolopa dedicada de 100 000 €, la Jurada qu'a retienut 14 projèctes laureats sus la basa deus objectius prioritaris e deus critèris de seleccion remembrats dens lo reglament d'intervencion d'aqueth Aperet a projèctes. Ua causida dificila au par de la qualitat e de la diversitat de las candidaturas. 

Los elegits qu'an votat en Conselh permanent lo 12 de deceme de 2023 las subvencions ad aqueths 14 projèctes laureats prepausats. Los laureats que son :

L'Union Comerciau e Artisanau de Sola entà l'organizacion de temps d'escambi enter hemnas enterprenedoras en Sola, en associacion dab l'ODACE, País Basco Au Còr e Andere Nahia : reünions qui'us permeten de ganhar en hidança, d'escambiar tanben bons plans, deus contactes, de las associacions, deus conselhs entà evitar de reprodusir las errors.
Montant de l'ajuda : 5 600 €

L'Associacion Pirenèus Que forma Gimnastica entau manteniment d'ua activitat esportiva a prètz accessible a destinacion de las hemnas souletines de tot atge : 23 cors collectius de gimnastica e fitness e RPM Bike que son estats organizats en 2023. Que mira 300 aderents en 2024 e 400 e en 2025.
Montant de l'ajuda : 7 500 €

Lo Collectiu souletin entà la constitucion e l'animacion d'un hialat qui permeterà a las hemnas de sortir de l'isolament en prepausant sortidas ne grop (sessions de teatre d'apartament, grop de paraula, ...).
Montant de l'ajuda : 8 000 €

La comuna de Sare entà la realizacion de 6 longs portrèits de hemnas "de l'ombra" deu vilatge, de ger e d'uei (collècta de testimoniatges e reportatges videos). Aqueths portrèits que seràn difusats au près deus residents EHPAD, deus escolans, pendent seradas deu vilatge, e per ua emission television sus Kanaldude.
Montant de l'ajuda : 10 000 €

Los talhèrs deu temps liure entà l'organizacion de talhèrs (tinturas vegetaus, culinàrias…) e d'eveniments culturaus per las hemnas de Hergarai.
Montant de l'ajuda : 5 000 €

L'Associacion de pelòta Zaharrer Segi entà la mesa en lutz e la valorizacion de la plaça de las hemnas dens aqueth espòrt per la formacion de las jogadoras joenas de pelòta, lo desvolopament d'ua seccion léser e l'auhèrta d'animacions exclusivament femeninas (torneis femenins de nivèu internacionau dab sustot la participacion de las campionas deu monde titular, escambis transfrontalèrs).
Montant de l'ajuda : 7 500 €

Hedabideak entà la realizacion d'ua emission TV e ràdio sus la plaça de las hemnas dens lo miei paisan.
Montant de l'ajuda : 3 200 €

Andere Nahia entà la perseguida de la desmarcha engatjada en 2021 entà sortir las agricultoras de l'invisibilitat, los ajudar a rómper l'isolament e ahortir l'enteraida enter parelhs e estructurar un collectiu : encontres paisans itinerants, intervencions suus estereotipes de genre dens los licèus agricòlas, formacions e obradors participatius (conduita de tractor, manejament d'estroncadera, sodadura,...), conferéncias e encontres a tèma (s'installar com hemna, congèt maternitat a la bòrda,...)..        
Montant de l'ajuda : 10 000 €

Xiberoko Botza entà l'organizacion de quate temps hòrts (entervistas, reportatges, taulas-rondas) sus las ondas de la ràdio souletine dab hemnas qui hèn víver aqueth territòri rurau, difusats suu site web e los hialats sociaus d'Euskal Irratiak.. 
Montant de l'ajuda : 7 472 €

Basandereak entà la creacion d'un grop femenin de Joaldun en vath d'Oztibarre e en se reapropriant lo personatge mitic de la Basandere.
Montant de l'ajuda : 9 960 €

Kanboko Izarrak entà l'estructuracion deus clubs deus Labourdins Ustaritz e Kanboko Izarra en vista de montar lo prumèr gropament de joenas fotbolairas (de 6 a 50 ans) e desvolopar lo fotbòl femenin en País Basco interior.
Montant de l'ajuda : 7 500 €

L'Associacion Baipeletenea elkartea entà l'organizacion d'ua jornada en heurèr de 2024 a Larceveau qui a per mira de lutar contra lo sexisme e los estereotipes de genre en Oztibarre, sustot en metent en lutz lo tribalh d'artistas hemnas de País Basco.
Montant de l'ajuda : 7 280 €

La comuna de Kanbo entà la sensibilizacion deus escolans de CM1, la lor familha e los abitants a la luta contra los estereotipes de genre e la mesa en lutz de las hemnas gràcias a l'organizacion de talhèrs, de visitas d'exposicion sus las hemnas a País Basco, la realizacion e l'exposicion de portrèits peus mainatges de l'escòla.         
Montant de l'ajuda : 2 000 €

Buzbu entà la creacion d'un lotjament d'urgéncia en Sola entà las hemnas victimas de violéncias o en situacion de precaritat dab un acompanhament sociau orientat cap tà l'accès a un lotjament perenne.
Montant de l'ajuda : 4 200 €