País Basco : la Banca Alimentària qu'organiza la soa 40au grana collècta annau

Cada annada, la Banca alimentària qu'organiza la soa grana collècta nacionau en favor deus plus des·hornits . A País Basco, près de 900 benevòles que seràn mobilizats deu 22 au 24 de noveme entà collectar un maximum de vitalhas entà afrontar la demanda creishenta.

En 2023 a País Basco, que son 12 800 personas qui son estadas ajudadas per la Banca alimentària. Ua chifra ne hauça de près de 7% despuish la debuta de l'annada, comparat a 2023.

Entà respóner ad aquera demanda, la Banca Alimentària que s'apièja sus un hialat hòrt de benevòles e d'associacions locaus. En tot que son près d'ua centena de partenàrias qui sostienen l'activitat de l'associacion.

Lo 6 de noveme darrèr, l'antena basca qu'a commemorat los 40 ans d'existéncia de las Bancas alimentàrias en França. Ad aquera escadença, elegits, enterpresas, e associacions partenàrias que son anats dens los lors locaus . Jean-René Etchegaray, President de la Comunautat d'Aglomeracion, qu'a saludat « la mobilizacion deus salariats, benevòles, partenaris e mecènas », renovelant l'engatjament de la Comunautat País Basco aus costats de la Banca alimentària.

La Comunautat d'Aglomeracion País Basco engatjada dens la luta contra la precaritat alimentària

La Comunautat d'Aglomeracion País Basco que s'ei engatjada aus costats de la Banca alimentària de Baiona e de País Basco dens la luta contra la precaritat alimentària en auto-finançant a hautor de 2,5 milions d'euros los locaus qui l'associacion aucupa despuish 2020. Mei recentament qu'a realizat amainatjaments entà simplificar lo tribalh de tots dab òbras suus cais e aus abòrds entà facilitar l'accès deus veïcules e las manutencions de cargament e de descargament.

Entà lutar contra la precaritat alimentària, lo CIAS País Basco que gereish ua especieria sociau a Garazi Baigorri, e que sostien financèrament ua auta especieria sociau associativa en Sola. Qu'organiza egaument l'activitat de benevòlas suu sector deu País de Bidaishe, entà la distribucion de l'ajuda alimentària. Aqueths diferents servicis que s'apièjan sus la Banca Alimentària . Aquesta que permet tanben d'avitalhar los benevòles qui cosinan los repaishs deu ser entaus migrants arcuelhuts au centre Pausa a Baiona o enqüèra la Taula deu Ser.

Un aperet aus benevòles entà la collècta nacionau

Si podetz consacrar tres òras deu vòste temps, los 22, 23 o 24 de noveme, a las pòrtas de las botigas o entà triar los dons dens l'enterpaus de la Banca alimentària de Baiona e de País Basco, qu'escrivetz a ba641banquealimentaireorg o qu'aperatz lo 05 59 55 05 00