Nouveau : lo balh a construccion, en sostien au desvolopament de las enterpresas

De cap a la rarefaccion deu fonsièr a País Basco, la Comunautat d'Aglomeracion que's mobiliza entà conjugar desvolopament economic productiu, sobrietat fonsièra e que luta contra l'especulacion . Qu'a sustot liberat 50 ectaras de fonsièr public entà crear 21 navèras zònas d'activitats dedicadas a las enterpresas taus com la d'Irissarry o entà bastir lo vilatge d'artisans Duboscoa II a Vilafranca.

Entà anar mei luenh, los elegits deu Conselh comunautari qu'an aprovat aqueth 7 de deceme lo balh a construccion. Ua modalitat de comercializacion unica deu fonsièr economic public sus l'ensemble deu territòri.

Un mecanisme vertuós

Instituït en 1964, lo balh a construccion qu'opèra ua separacion enter lo terren e lo bastit. La Comunautat́ País Basco, l'arrendador, que demora proprietari deu fonsièr que lòga en permetent a l'enterpresa, lo prenedor de balh, de dispausar de drets reaus de proprietat suu bastiment qui basteish, pendent tota la durada deu balh fixat ací a 50 ans, renovelable.

Après prumèras experimentacions qui an dejà avut lòc sus l'ensemble deu territòri, la sistematizacion d'aquera modalitat navèra de comercializacion que s'aplicarà sus l'ensemble deus fonsièrs prepausats. Actuaument la Comunautat d'Aglomeracion dispausa d'un estòc d'11 ectaras e que preved d'amainatjar 7 ectaras dens las duas vienentas annadas e 50 en mei dens las 5 a 10 ans devath resèrva de las proceduras. 

Deus avantatges recipròcs

Aquera atruna juridica qu'ei estada adoptada entaus avantatges qui presenta entà las duas partidas, la Comunautat d'Aglomeracion e las enterpresas.


1. Manteniment de l'activitat e de la proprietat fonsièra : la Comunautat d'Aglomeracion País Basco que consèrva la proprietat deus terrens, çò que'u permet de mestrejar la lor afectacion futura e de mantiéner ua activitat productiva o artisanau sus aqueths terrens.

2. Drets reaus entà l'enterpresa : l'enterpresa productiva o artisanau que basteish lo son bastiment, que n'ei proprietari pendent 50 ans dab possibilitat de transméter, logar, cedir, ipotecar lo son ben. L'immobilizacion qu'ei atau inscrivuda a l'actiu deu son bilanç.

3. Securitat entà las enterpresas : la durada de 50 ans qu'ei pro longa entà garantir ua rentabilitat economica entà las enterpresas investint dens la lor atruna de produccion sus aqueths terrens, auherint atau un quadre estable entaus projèctes a tèrmi long.