Inauguracion « Còr de campus » : au còr de l'innovacion e de la construccion duradissa

« Dab Néo Terra, adoptada autanlèu 2019, la Region Novèla Aquitània que s'engatja pleament dens la transicion ecologica e energetica . Lo projècte "Còr de Campus" que formarà 2 000 aprenents, sustot dens la construccion duradissa, un lhevader essenciau entà redusir las emissions de CO₂ », qu'a soslinhat Alain Rousset, president deu Conselh regionau de Novèla Aquitània.

Ua progression remarcabla despuish 2017

Despuish la creacion de la Comunautat d'Aglomeracion País Basco en 2017, lo nombre d'estudiants sus l'ensemble deu territòri qu'ei passat de 6 500 a 9 500. Aquera chifra qu'includí los estudiants de las universitats, deus establiments privadas e de las formacions pòst-bac. Aquera evolucion qu'illustra l'engatjament hòrt de la Comunautat d'aglomeracion entà desvolopar un ensenhament superior adaptat aus besonhs deu territòri. Lo programa Còr de Campus, inscrivut dens lo plan Estat-Region 2015/2020, que constitueish ua estapa clau dens aquera estrategia . A Montaury, aqueth projècte qu'amassa 2000 aprenents especializats en sciéncias e tecnicas e sustot dens la cordèra construccion duradissa.

Tres realizacions màgers entà un campus d'excelléncia

Lo programa Còr de Campus, portat per la Comunautat País Basco, que pausa  sus tres infrastructuras fars :

• ISALAB, un bastiment ecoresponsable de 4 200 m² dedicat a l'escòla d'engenhaires ISA-BTP e aus sons laboratòris de recèrca.
• L'Ostau deus Estudiants, un espaci polivalent integrant equipaments culturaus e esportius, un FabLab, un restaurant universitari deu CROUS e un parcatge en superstructura equipat de panèus fotovoltaïcs.
• L'Agòra, ancian parcatge tornat qualificar en vaste espaci pedanhèr vegetalizat de 6 000 m² favorizant los escambis enter los actors deu site.

Aqueras infrastructuras qu'auhereishen aus estudiants un quadre ideau entaus lors estudis, nidat au còr d'Anglet e perfèitament desservit peus transpòrts en comun.

Tot un ecosistèma innovant 

Lo site Montaury que benefícia d'un environament ric en estructuras dedicadas a l'innovacion e a la formacion dens lo maine de la construccion duradissa :

• ISA-BTP : Escòla publica d'engenhaires de l'Universitat de Pau e deus País d'Ador. Que forma haut o baish 80 engenhaires per an dens maines taus com l'engèni civiu, maritime, energetic e duradís.
• Laboratòris SIAME e LFCR de l'UPPA : Aqueras unitats de recèrca que pòrtan ua expertesa scientifica puntuda dens los maines ligats a l'energia e a l'environament.
• Licèu Cantau : Establiment reconegut entà las soas formacions tecnicas adaptadas aus mestièrs deu bastiment.
• Federacion compagnonnique deus mestièrs deu bastiment : Organizacion emblematica qui transmet saber-har artisanau e valors tradicionaus per trajèctes d'excelléncia.
• Nobatek/INEF4 : Centre tecnologic privat dedicat a la transicion energetica e environamentau deu bastiment. Labellisé Institut nacionau entà la Transicion Energetica (ITE), qu'acompanha la cordèra dens l'innovacion e lo desvolopament duradís.
• Generator d'activitats Arkinova : ua plantanha-incubateur ibrida dedicada a l'innovacion dens lo maine de la construccion e de l'amainatjament duradís. Proprietat de la Comunautat d'Aglomeracion País Basco, aqueth bastiment qu'ei concebut entà sostiéner los portaires de projèctes, start-ups e enterpresas innovantas.

Budget deu programa Còr de Campus  
Montant totau HT : 20 691 000 €                           
Comunautat País Basco : 8 420 000 €
Region Novèla Aquitània : 5 208 000 €
FEDER : 4 167 000 €
Estat : 2 500 000 €
Comuna d'Anglet : 396 000 €