Euskararen Urtaroa : 100 eveniments entà practicar l'euskara au quotidian deu 22 de noveme au 3 de deceme

Dens l'encastre de la soa politica lingüistica en favor de la lenga basca, la Comunautat País Basco que's mobiliza dab las soas partenàrias – comunas, associacions e actors privats – entà desvolopar servicis, de las atrunas e deus espacis qui facilitan la practica de l'euskara au quotidian.

Deu 22 de noveme au 3 de deceme, Euskararen Urtaroa que valoriza aquera accion collectiva e que prepausa rendètz-vos inedits despartits sus l'ensemble deu territòri : conferéncias, espectacles, talhèrs, visitas guidadas... ua varietat d'activitats orientadas suu plaser e los lésers entà tastar, escotar, lira, o simplament practicar l'euskara. Qu'ei en tot ua centena d'eveniments qui seràn organizats pertot suu territòri.

Ua navèra edicion obèrta a tots

Euskararen Urtaroa qu'ei obèrt a tots, e cadun qu'i a un ròtle a jogar !

• Entaus euskaldun e los locutors navèths, qu'ei ua oportunitat beròja d'encontres e de moments agradius partatjats en euskara.
• Entaus aprenents, qu'ei l'escadença perfèita entà practicar e s'immergir dens un environament bascofòne.
• E entaus qui desiran descobrir l'euskara, de las animacions dab traduccion simultanèa que permeten un prumèr contacte dab la lenga .

Deus eveniments entà tot lo territòri

Deu 22 de noveme au 3 de deceme, 100 eveniments que van perméter a cadun d'i trobar entau son compte.

• Deus espectacles a véder e a escotar : Lo divés 22, lo filme Irati que serà projectat a Bardòs . « Huntaz eta Hartaz », l'espectacle de Ruper Ordorika e Joseba Sarrionaindia, que serà lo dissabte 23 a Tardets-Sorholus e lo dimenge 24 a Larceveau-Arròs-Cibits.
• Deus talhèrs entà apréner e pensar : Lo conservatòri Maurice Ravel qu'organiza la conferéncia musicau « Arteen artean » (Au demiei de las arts) suus instruments dens la musica de País Basco lo dijaus 28 de noveme au Musèu Basque de Baiona. Lo divés 29 a Sent Martin d'Arberoue, un talhèr de lectura entà mainadas qu'ei organizat a la sala Bil Etxea, seguit d'un tastat auhèrt. Lo dimenge 1èr deceme, a Laguinge-Restoue, lo libe Miñan (Petit Frère) d'Amets Arzallus e Ibrahima Balde que serà presentat, seguit de la representacion de la pèça de teatre deu medish nom.
• De las activitats entà jogar e tastar : talhèrs de dança entà mainadas e parents que son organizats a Sent Pèir d'Irube lo dissabte 23 de noveme. Lo medish dia, un jòc de pista qu'ei organizat en associacion dab l'associacion Sarda Sardexka, a la descobèrta d'un hormatge d'aulha a Saint-Palais, en partint de l'ostau de la Comunautat d'aglomeracion. Lo dimèrcs 27 de noveme, lo jòc de pista qu'arriba a Maulion-Licharre, a la partença de l'Ostau deus Servicis Publics.
• De las sortidas entà descobrir e apreciar lo territòri : Pendent Euskararen Urtaroa, que descobreishetz las 17 caças deus tesaurs de l'aplicacion Terra Qu'aventurè disponiblas en euskara despuish l'11 d'octobre .

Euskarararen Urtaroa que's perlonga dinc au 3 de deceme, jornada internacionau de l'euskara qui hesteja aquera annada los sons 75 ans.

Retrobar tots los eveniments sus l'agenda en linha.