Creacion d'un mastèr d'art a l'Escòla superiora d'Art País Basco
Aqueth dimèrcs 2 d'abriu, Jean-René Etchegaray, President de la Comunautat País Basco, Jean-Pierre Laflaquière, Vicepresident ne carga de l'Ensenhament superior, de la recèrca e de la formacion, e Delphine Etchepare, Directora de l'ESAPB, qu'an anonciat conjuntament la creacion d'un mastèr d'art dens l'establiment. Aquera decision que hè pròva de l'engatjament continú de la Comunautat País Basco de cap a l'ESAPB e la soa volontat d'ahortir l'auhèrta d'ensenhament superior artistic suu territòri.
Actualizat lo : 3 April 2025
Despuish seteme de 2024, l'ESAPB que prepausa un segond cicle miant a un diplòma nacionau valent grade de mastèr. Aquera evolucion màger que completa l'auhèrta de formacion existenta, qui compren :
- Duas classas preparatòrias (art e design)
- Un prumèr cicle miant a un diplòma nacionau de nivèu licéncia
- Deus talhèrs de practicas plasticas amatoras, adultas, adolescents e mainatges autanlèu l'atge de 7 ans. Aqueths talhèrs que cobreishen un large ventalh de disciplinas artisticas (dessenh, pintrura, ceramica, escultura, gravadura, fotografia e quitament multimèdia o graff).
Ua formacion ancorada dens lo territòri
Lo projècte pedagogic deu mastèr que s'inscriu pleament dens la dinamica transfrontalèra de l'establiment . Lo son ancoratge territoriau qu'auhereish ua basa propícia a modalitats pedagogicas especificas, deus seminaris de recèrca, deus viatges d'estudi e de las mobilitats internacionaus.
Jean-René Etchegaray qu'a soslinhat : “Mentre que dens de nombrós territòris, la cultura qu'ei relegada au segond plan, qui las escòlas d'art deven lutar contra un desengatjament progressiu de l'Estat e de las restriccions budgetàrias, ací, a País Basco, que hèm ua causida clara : que la sostienem, que l'encoratjam, que la defenem .”
Jean-Pierre Laflaquière qu'a deu son costat indicada : “Lo mastèr d'art que permet un reau enriquiment de l'ensenhament superior artistic suu noste territòri, portant ua dimension transfrontalèra, europèa e internacionau.”
Ua pedagogia innovanta
L'ESAPB que's distingueish per :
- Ua equipa pedagogica compausada d'ensenhaires permanents e d'artistas convidats
- Ua politica sostienuda de convit de professionaus de l'art contemporanèu
- De las modalitats pedagogicas especificas : seminaris de recèrca, viatges d'estudi, mobilitats internacionaus
L'obertura d'un mastèr que permeterà aus estudiants en licéncia e en classa preparatòria de finalizar lo lor cursus d'estudis a País Basco e a s'inserir dens la vita activa suu territòri. Que permeterà egaument d'atirar estudiants de tots orizonts. Cada estudiant qu'i ei miat a desvolopar lo son projècte individuau de recèrca en art e de professionalizacion, en includint ua dimension transfrontalèra e internacionau. L'estudiant qu'elabòra atau un tribalh que plastica de seguida, que realiza ua mobilitat academica o un estagi e que redigeish un memòri .
Un sostien institucionau hòrt
La Comunautat País Basco que reafirma lo son engatjament de cap a l'ESAPB, establiment public de cooperacion culturau devath tutèla deu ministèri de la Cultura. Aqueth sostien que s'inscriu dens ua volontat de desvolopar l'auhèrta d'ensenhament superior artistic suu territòri, permetent aus talents joens de's formar e de s'espandir locaument.
Dab los sons 120 estudiants en formacion superiora e près de 1 000 amatoras participant aus talhèrs, l'ESAPB que s'afirma com un actor màger de la vita universitària e artistica de País Basco.
Exposicions Dominique Berthommé deu 10 d'abriu au 7 de junh
Dominique Berthommé (1945-2022) qu'ei estada director de l'escòla municipau de dessenh de Baiona, qui precedeish l'actuau Escòla superiora d'art País basco, de 1985 a 2012. Qu'a pregondament mercat l'istòria de l'establiment en fabricant ua meravilhosa maquina d'emancipacion entà compréner e ressentir lo monde.
Entà celebrar la soa memòria, l'ESAPB que s'ei associada aus actors de l'art contemporanèu deu territòri qui son lo Centre d'art contemporanèu d'Anglet e la galeria l'Estacion V a Baiona entà organizar tres exposicions, amassant sustot las òbras d'ancians escolans de Dominique Berthommé, vaduts artistas.
Exposicions :
- La pedagogia au servici de l'art
De l'11 d'abriu au 24 de mai, Galeria de l'Escòla superiora d'art País Basco, Citat de las Arts, Baiona - La preservacion deu huec
Deu 12 d'abriu au 7 de junh, Villa Beatrix Enea e Galeria Georges Pompidou, Anglet - L'espaci dens la paret
Deu 10 au 26 d'abriu, Estacion V, Baiona
Vernissatges :
- A la Ciutat de las Arts, lo 10 d'abriu a 19h ;
- A la Villa Beatrix Enea e a la Galeria Georges Pompidou, l'11 d'abriu a 18h30.